“聊天”唔系“吹水”

  白话广州

  单位领导何总系一名新广州人,早几日,佢喺朋友圈写到“为什么广州人将聊天称为‘吹水’”,一时间引嚟一大堆跟贴。

  既然呢个话题咁受关注,小弟今日就借《云山论见》一角,向何总汇报一下自己对粤语中交谈各种叫法嘅睇法。

  严格讲,粤语中嘅“吹水”唔系普通话嘅“聊天”。粤语有关进行语言交流嘅叫法(嗌交除外),会根据内容分为倾偈、打牙骹同埋吹水三个词组。网上资料对呢三个叫法都简单等同作聊天,系唔啱嘅。

  倾偈:交流嘅内容通常比较正经,有普通交谈嘅,有商量事情嘅。个人认为,粤语嘅“倾偈”先至系普通话所讲嘅“聊天”。

  打牙骹:听个名就搞笑吧,呢个词组系讲交流嘅内容比较随意,有正经嘅,亦有唔正经嘅,通常系指消磨时间嘅交流,相当于普通话嘅“侃大山”。需要说明,“打牙骹”并非嚟自香港,广州人一直都有讲。

  吹水:顾名思义,交流嘅内容有吹嘅成份,夸大作大嘅有,乱噏廿四嘅有,呢个词组有时甚至可等同讲大话,比如讲“吹水唔抹嘴”就系指讲大话都唔识掩饰。粤语“吹水”有啲似普通话嘅“胡侃”。

  倾偈、打牙骹、吹水系有区别嘅,唔可通用。◎阿六 律师